The Bay Awards nazioarteko sariak

Mundu osoko 300 aditu eta ordezkari instituzional baino gehiagok, eta 200 herrialdetik gorako 6.000 pertsona baino gehiagok on-line, hartu dute parte sarien lehen edizioaren banaketa ekitaldia jaso duen The Bay Awards Summit Kongresuan.

“Urban Pioneers” saria Curitibari (Brasil) emateaz gain, epaimahaiak Bogotan, Detroiten, Hegoafrikan eta Singapurren gauzatutako proiektuak eta ekimenak ere saritu ditu, “SDG Champions”, “Partners in progress”, “Properity Catalyst”, eta “Horizon Shapers” kategorietan hurrenez hurren.

https://youtu.be/QgxjGnE8mloBrasilgo Curitiba hiriak irabazi du Bilbao Metropoli 30 Bilboko metropoli-eremua biziberritzeko elkarte publiko-pribatuak emandako “Urban Pioneers” kategoriako The Bay Awards lehen Saria. Saria Guggenheim Bilbao Museoan egindako gala berezi batean eman da ezagutzera, mundu osoko 300 hirigintza-adituk baino gehiagok parte hartuta Bizkaiko hiriburuan egin den “The Bay Urban Visioning Awards Summit” Kongresuaren barruan.

Maila globalean hiri-plangintzaren arloan ospe handia duten bost gizonek eta bost emakumek osatutako epaimahaiak baloratu du “Curitibak zailtasun handiko egoeretan giza eskalako hiri-plangintzaren alde egindako apustua, eraldaketa konplexuenak posible direla frogatuz”. Amaia Arregik, Bilboko Udaleko ordezkari nagusi gisa, Liana Vallicelli Curitibako Nazioartekotze zuzendariari eman dion sari horrekin, nazioarteko epaimahaiak Brasilgo hiria “hiri-eraldaketaren legenda gisa finkatu dela” nabarmendu nahi izan du.

Horrela, Curitibak inauguratu du, giza garapenean duen eragin positiboarengatik eta beste hiri batzuentzat eredu izateko duen gaitasunarengatik, Bilbotik hiru urtean behin hiri-iraultzarako bidean arrakasta kasu gisa aintzatesiko diren hirien zerrenda. Horrela, nabarmentzekoa da epaimahaiak aipamen berezia egin izana Eskoziako Glasgow hiriari, hiri postindustrial izatetik ezagutzan oinarritutako ekonomiako lider izatera aldatzeagatik.

Bilbao Metropoli 30etik The Bay Awards-en espiritua azpimarratu nahi izan da, inspirazio-iturri izan daitezkeen mundu osoko hiri-jardunbide egokiak ikusarazteko eta ospatzeko plataforma gisa, Galan agerian geratu zen bezala, Guggenheim Museoko auditorioak lehen edizio honetako ekimen guztiak txalotu zituenean. Era berean, aurtengo ediziora aurkeztutako 100 proiektu baino gehiago elkarte publiko-pribatuak argitaratuko duen gordailu batean sartuko dira.

Proiektuaren beste elementu nabarmenetako bat ekimenak Bilbao Metropoli 30eko bazkideen artean sortu duen laguntza publiko-pribatua da, bai eta beste erakunde batzuena ere, hala nola hitzorduan parte hartu zuten Nazio Batuen 2030 Tokiko Koalizioaren Idazkaritzarena edo Singapurreko ordezkariena. Horrek karga sinboliko handia du, Bilbo izan baitzen 2010ean Lee Kuan Yew saria jaso zuen lehen hiria.

Bilboko Udalaren babesa duen “Urban Pioneers” saria banatzeaz gain, galan “The Bay Awards” lehiaketaren lehen edizio honetako beste lau kategorietako irabazleak ere jakinarazi dira. Bizkaiko Foru Aldundiaren laguntza duen Prosperity Catalyst kategorian, hiri-baratzeak, segurtasun-patruilak, arte publikoa edo ibaien berroneratzeea bezalako gizarte-proiektuen bidez lan-eskatzaileen enplegagarritasuna hobetzea sustatzen duen Hegoafrikako Ondasun Komunerako Enplegu Sozialaren proiektua saritu da. Epaimahaiak modu berezian baloratu du “garatzen den komunitateetan aberastasuna sortzeko duen gaitasuna, eta oparotasuna sortzeak guztion onerako ere balio dezakeela erakutsi izana”. Elixabete Etxanobe Bizkaiko Ahaldun Nagusiak berak banatu zuen saria.

Eusko Jaurlaritza buru duen SDG Champion kategoriaren kasuan, Bogota hiriko (Kolonbia) “Manzanas del Cuidado” proiektua saritu da, “zaintza-lanaren eragina eta garrantzia nabarmendu eta aitortzeagatik, ikusarazi, neurtu eta modu zuzen eta erantzunkidean birbanatzeagatik, eta hori bideratzeko beste hiri-desberdintasun asko zeharka estaltzen dituen modua garatzeagatik”. Saria Asier Aranbarri Eusko Jaurlaritzako Gizarte Berrikuntzako zuzendariak eman zuen.

BBK Fundazioaren babesa duen Horizon Shaper kategorian saritutako ekimena Singapurren dementzia duten pertsonentzako auzo lagunkoien proiektura joan da. Ekimen horrek proiekzio handia du Euskadi bezalako tokietan, izan ere arazo hori etengabe eta gero eta gehiago hazten ari da, populazioaren zahartzearen ondorioz. Ekimen horri esker, pertsona asko euren etxeetan zahartu daitezke eta egoitzetan sartzea atzeratu. Epaimahaiaren iritziz, proiektu honek “gure gizarteetan premiazkoa bihurtzen ari den epe luzerako erronka bati aurre egiteko aukera ematen du”. Saria Nora Sarasola BBK Fundazioko Gizarte Ekintzako zuzendariak eman zuen.

Azkenik, Bilboko Portu Agintaritza eta Petronor elkarlanean aritzen diren Partners in progress kategorian Detroiteko (AEB) Kultur Barrutia aintzatetsi da. Bertan, erakundeak eta kultura-eragileak biltzen dira, arkitekturako eta ingeniaritzako profesionalekin batera, hiriaren plangintza eta kudeaketa kulturala uztartzen dituen elkarte baten inguruan, hiriaren erdigunean dagoen 33 hektareako gunean. Proiektu horri esker, automobilak erabiltzen ari diren eremuen % 40 pertsonentzako gune bihurtzea aurreikusten da. Zehazki, “proiektuak eragin handiko lankidetza-mekanismoak sortzeko duen gaitasuna” baloratu du epaimahaiak. Mekanismo horiek, gainera, “automobilaren kulturari aurre egiteko gai izan dira, mugikortasun-aro gizatiarragoa, tokikoagoa eta jasangarriagoa iragarriz”. Jose Ignacio Zudaire Petronorreko CEOaren Albokoak, eta Itziar Sabas Bilboko Portuko Agintaritzako Giza Baliabideen eta Komunikazioaren Zuzendariak banatu dute saria.

Erreferentziako Nazioarteko Kongresua

“The Bay Awards” gala “The Bay Awards Summit” kongresuaren lehen jardunaldiaren amaiera izan da. Ekitaldian 300 ordezkari instituzional baino gehiago izan dira, baita mundu osoko hirigintza eta plangintza estrategikoko kide ospetsuak ere, eta streaming bidez zuzenean jarraitu dute 200 herrialdetik gorako 6.000 pertsonak baino gehiagok. Irekiera instituzionalaren ondoren, kongresuari hasiera emateko hiriko nazioarteko hizlariek hitzaldi magistralak eman zituzten. Aurkezpen horiek The Bay Awards sarietako bost kategorietako hiru proiektu finalisten eztabaida-saioekin tartekatu ziren, ebaluatu dituzten epaimahaikideek moderatuta.

Egun horretan bertan, Singapurreko Lee Kuan Yew sarietan sarituak izan diren hirietako hausnarketa estrategikoko erakundeen eztabaida saioa ere egin zen. Moderatzailea Michael Koh izan zen, Singapurreko Centre for Liveable Cities delakoaren Exagive Fellow-a. Sare hori osatzen duten hirien artean daude Bilbo –2010ean sari hori lortu zuen lehen hiria–, New York, Suzhou, Medellin, Seul, Viena eta Mexiko Hiria. Saritutako hiri horien arteko lankidetzatik euren hirietako epe luzerako estrategian lan egiten duten erakundeen sarea sortu da. Aurreko egunean Bilbao Metropoli 30ek Learning Journey bat antolatu zuen gure metropoliko proiektu estrategikoenetako batzuk bisitatu zituzten nazioarteko bisitarientzat.

“Urri Hiritarra” ospakizun globalaren barruan dagoen “The Bay Awards Summit”-en lehen edizioaren emaitza, Bilbao Metropoli 30ek hiri esperientzien nazioarteko plataforma finkatzen laguntzeko eta ikaskuntza partekatuaren prozesua indartzeko egingo duen gordailu batean islatuko da.

Informazio gehiagorako: www.thebayawards.com

https://youtu.be/M3V14TnmLt8